Psa 94 | NdeIBE | STEP | O Jehova, uNkulunkulu ophindiselayo, O Nkulunkulu ophindiselayo, khanya uvele.

Psalms 94

1 O Jehova, uNkulunkulu ophindiselayo, O Nkulunkulu ophindiselayo, khanya uvele.

2 Phakama, hawu Mahluli womhlaba; baphindisele abazigqajayo ngokubafaneleyo.

3 Koze kube nini ababi, O Jehova, koze kube nini ababi beklamasa na?

4 Bathulula amazwi okukloloda; zonke izigangi zifuthelene ngokuzikhukhumeza.

5 Ziyabanyathezela abantu bakho, O Jehova; zicindezela ilifa lakho.

6 Zibulala umfelokazi kanye lowezizweni; zibulala intandane.

7 Zithi, “UJehova kaboni; uNkulunkulu kaJakhobe kananzi.”

8 Limukani, lina elingelangqondo phakathi kwabantu; lina ziphukuphuku, lizahlakanipha nini?

9 Yena lowo owayigxumekayo indlebe kezwa yini? Yena lowo owabumba ilihlo kaboni na?

10 Yena lowo oqondisa izizwe kajezisi yini? Yena lowo ofundisa umuntu kalalwazi na?

11 UJehova uyayazi imicabango yomuntu; uyayazi ukuthi iyize nje.

12 Ubusisiwe umuntu omqondisayo, O Jehova, umuntu omfundisa okomthetho wakho;

13 uyamphumuza ezinsukwini zokuhlupheka, kuze kuthi ababi bembelwe igodi.

14 Ngokuba uJehova kazukwala abantu bakhe; kasoze lanini afulathele ilifa lakhe.

15 Ukwahlulela kuzaphinda njalo kumiswe ngokulunga, kuthi bonke abaqotho ngenhliziyo bakulandele.

16 Ngubani ozangimela ekulweni lababi na? Ngubani ozangelekelela ekulweni lezigangi na?

17 Aluba uJehova wayengangelulekanga, ngabe ngahle ngahlala ngathula zwi ekufeni.

18 Lapho ngasengisithi, “Unyawo lwami selutshelela,” uthando lwakho, O Jehova, lwangisekela.

19 Nxa ukunqineka kwase kungikhulela, induduzo yakho yaletha intokozo emphefumulweni wami.

20 Kambe isihlalo sobukhosi esixhwalileyo singema lawe yini – leso esiletha izinhlupheko ngezimemezelo zaso?

21 Bayahlangana ukumelana labalungileyo ongelacala agwetshelwe ukufa.

22 Kodwa uJehova useyinqaba yami, loNkulunkulu wami ulidwala engiphephela kulo.

23 Uzabaphindisela ngenxa yezono zabo ababhubhise ngenxa yobubi babo; uJehova uNkulunkulu wethu uzababhubhisa.